Snilldarmatur á Argentínu í gær. Því miður varð ég ekki var við neinn af mínum með hjólbörurnar og þó hefði ekki af veitt. Kostaði bara 3990 á mann og þar sem ég átti gjafabréf upp á 8000 kr passaði þetta fullkomlega. Eina kvörtunarefnið var að lítil kók í gleri kostaði 300 kall.

Ég er að horfa á Die Hard í vinnunni. Er ekki Alan Richman besta/versta illmenni í heiminum.

Ég ætla ekki að skrifa neitt ljótt um Auði núna enda fékk ég hörð viðbrögð síðast. Svo átti hún líka afmæli í gær og því ekki við hæfi að tala illa um hana. Enda ekkert ljótt um hana að segja. Ég var í skírnarveislu í gær hjá Helga bróður og Önnu Kristínu. Stelpan fékk nafnið Anna Alexandra og ber því tvöfalt drottningarnafn. Ekki slæmt það! Hún er nefnd eftir eftir Ömmu sinni sem hefði átt afmæli í gær. Í kvöld ætlum við Auður út að borða á Argentínu og að sjálfsögðu býð ég vegna þess að ég er svo mikill höfðingi. Að vísu er aðalástæðan sú að ég á gjafabréf sem ég vann á einhverri útvarpsstöð fyrir nokkrum árum en hef aldrei notað. Mér skilst að það sé byrjað jólahlaðborð hjá þeim, þannig að ég reikna með því að vera keyrður úr á hjólbörum þegar kvöldið er úti.

Ekki trúa neinu af því sem ég var að skrifa, ég er enn þá kóngur á mínu heimili, eða þ.e.a.s. heimili foreldra minna. Núna þegar stendur ekki yfir mér, get ég skrifað það sem ég vil. Múhahahahahahaha!!!

Ehemm. Ég þarf víst að leiðrétta svolítið. Ég er víst ekki búinn að temja hana Auði nógu vel. Í gærkveldi fór hún eitthvað út án mín og sendi mig einan í bíó í staðinn. Mér varð það víst á að sýna henni þessa síðu og hún var alls ekki ánægð með það sem hún sá. Núna sit ég hérna blár og marinn eftir hana og reyni að biðjast afsökunar.

Ég er svo mikill kóngur!!! Ég minntist á það við Auði um daginn að bílinn minn væri skítugur og það þyrfti eiginlega að þrífa hann. Svo var það einhvern tíma að ég var í vinnunni og lánaði Auði bílinn. Þegar ég fékk hann aftur var búið að þrífa hann bæði að utan og innan. Ég er greinilega búinn að temja hana nógu vel!!!

Ég stóð í röð í tæpa tvo tíma til þess að fá miða á Nick Cave tónleikana sem verða 9. nóv. Nú held ég að Arnór og Helgi bróðir skuldi mér BigTime. Það var ískalt og rigning en það var þess virði þegar ég fékk einn af síðustu miðunum. Alger snilld!!!

Ég gleymdi að minnast á það að Maggi er búinn að borga mér líka. Nú eru allir skuldlausir við mig og ég hef ekkert til að nöldra yfir :(

Ég sit núna í vinnunni og læt mér leiðast. Nú hef ég oft montað mig af vinnunni minni og ekki að ástæðulausu. En núna er ég með tvo fótboltaleiki í sjónvarpinu. Annars vegrar er Hereford-Wigan í enska bikarnum og hins vegar er eitthvað sem að ég held að sé leikur í Dubaienska bikarnum!!! Annars vegar er lið í bláum og hvítum búningum og hins vegar lið í hvítum og bláum búningum. Hversu lágt er hægt að leggjast, horfa á Dubaienskan fótbolta!!!

Ég sá í kommentunum að Þorri frændi hefur afneitað mér!!! Hmmmm. Við erum væntanlega að fara að spila fótbolta saman þannig að það er spurning hvort hann ætti ekki að hafa mig góðan. Mér skilst að það geti verið ansi óþægilegt að fá takka í hnéskelina!!!

Hmmm. Ég gleymdi annars að óska Gunna og Sollu til hamingju. Til hamingju Gunni og Solla.

Gunni var að hringja áðan og tilkynna mér að hann væri nýgiftur!!! Hvað er eiginlega í gangi? Hvað varð um steggjunina? Hvar er stripparinn? Af hverju er verið að svíkja okkur um það sem að við eigum rétt á samkvæmt ævafornum hefðum? Ég er alveg brjálaður

Arnór var að kvarta yfir því að sagan mín væri ekki fyndin lengur og að ég þyrfti að skrifa eitthvað nýtt. BULL!!! Sagan mín er enn þá fyndin og ég vil ekki heyra annað.

Skemmtileg saga. Ég fór áðan að kaupa peru fyrir bílskúrinn, enda var pabbi búinn að nöldra í mér í rúma viku. Ég fór loksins í einhverja ljósabúð og bað um peru og fékk hana með það sama. Ég gekk út með peruna í poka, nokkuð ánægður með sjálfan mig. Þegar ég stíg inn í bílinn hringir síminn og ég sest niður til þess að svara honum og loka bílhurðinni á eftir mér. En ég fattaði ekki að ég hélt enn þá á pokanum í hendinni og tókst að skella bílhurðinni á peruna. Að sjálfsögðu mölbrotnaði hún og ég þurfti að fara aftur inn í búðina og útskýra fyrir afgreiðslumanninum hvað hefði komið fyrir. Þegar hann hætti að hlæja lét hann mig fá nýja peru og bauðst til þess að fylgja mér út í bíl svo að ég færi mér ekki að voða á leiðinni.

Núna var Kjarri að borga mér og þá er bara Maggi eftir. Það er verst að þegar hann er búinn að borga þá hef ég ekkert til þess að skrifa um!

Ég ætlaði líka að minnast á það að Líney er búin að borga mér þannig að núna eiga bara Kjartan og Þverbrekkingurinn, ef brekking skyldi kalla, eftir að borga. Skammist ykkar mannfýlur!!!

Það eru asnalegar kennslubækur sem að ég er að lesa fyrir þetta verkefni mitt. Þær eru allar á útlensku, en ekki svona útlensku sem er alltaf í sjónvarpinu heldur öðru vísi útlensku sem er allt of erfitt að skilja.

Sá litlu frænku mína í gær. Þar sem að ég er mikill karlmaður ætla ég ekki að lýsa henni hér enda eiga karlmenn ekki að kunna lýsingarorð sem lýsa litlum börnum. En svo að ég vitni í pabba „Hún er alveg eins og pabbi hennar var. Gerir ekki annað en að drekka og sofa.“

Ég sit núna niðri Háskóla og er að gera eitthvað leiðinda verkefni sem ég á að skila á morgun. Þó að það sé hundleiðinlegt að vinna svona verkefni þá er ágætt að hanga í skólanum aftur. Fór á kaffistofuna í hádeginu og hitti þar sama fólkið og sat þar þegar ég byrjaði í skólanum fyrir 6 árum síðan. Og ekki nóg með það heldur eru alltaf sömu sögurnar jafn vinsælar. Til dæmis er fátt skemmtilegra en að heyra Bergstein sagnfræðinema (sem er reyndar nýorðinn BA) segja söguna af Gumma busa. Hér verður ekki farið nánar út í þá sögu, en þeir sem vilja heyra hana er bent á að fara á kaffistofuna í Árnagarði og leggja þar við eyrun.

Jibbíííííííííííí!!! Ég er orðinn alvöru frændi. Helgi bróðir og Anna Kristín eignuðust stelpu klukkan 23:02 í gærkvöldi (28. okt)