Ég vil byrja á því að þakka fyrir þær rífandi móttökur sem endurkoma mín hefur fengið. Allt að verða vitlaust og vinsældir mínar aldrei meiri. Auður var rétt í þessu að klára síðasta prófið og fær innilegar hamingjuóskir með það. Hún hefur staðið sig vel en ég er feginn að þetta er búið því þá þarf ég ekki lengur að sinna öllu sem þarfa að gera heima. Í grófum dráttum höfum við skipt húsverkunum þannig á milli okkar að ég sé um eldamennsku en hún um þrif, en ég hef reyndar aðstoðað nokkuð við þrifin. Undanfarin mánuð hefur þetta hins vegar lent allt á mér vegna prófanna og er svo sem ekkert við því að segja. En þessi prófalestur gerir fólk skrýtið. Til dæmis lá ég uppi í sófa kl. 23 í gærkvöldi og var að lesa í bók á meðan Auður var að lesa. Allt í einu heyri ég: Á ekki að baka neitt fyrir mig?" Ég svaraði að það væru nú enn nokkrir dagar í jólin. "Á ég þá ekki að fá neinar smákökur núna á meðan ég er að lesa?" Ég gat ekki svarað þessu og þess vegna stóð ég við eldavélina kl 12 á miðnætti að taka plötur út úr ofninum og setja inn aftur. En það virðist hafa virkað því Auður fékk kökurnar sínar og gekk svo vel í prófinu í dag.

Góð setning sem heyrðist heima hjá mér um daginn. Hjá okkur var þriggja ára stelpa sem er að uppgötva jólin og hefur heyrt að þau séu alveg að koma. Hún sat og horfði á sjónvarpið þegar dyrabjöllunni var hringt. Ég spurði hana "Hver er að koma." Hún svaraði að bragði "Jólin," og hljóp svo fram til að hleypa jólunum inn. Varð fyrir miklum vonbrigðum þegar hún komst að því að það væri bara verið að sækja hana.

Þegar maður ætlar að vera virkur í blogginu finnst manni að maður þurfi alltaf að vera að blogga. Þá verða til færslur eins og þessi fyrir neðan, ekki um neitt og engum til góðs eða gamans. Eins gott að ég er búinn að átta mig á þessu og geri þetta ekki aftur.

Mikið að gera í vinnunni þessa dagana. Það þarf að lesa alla jóla- og áramótadagskrána og og helst með einhverjum fyrirvara vegna frídaganna, sem eru reyndar ekki margir þessi jólin. Þess vegna hefur það verið vel þegið að við höfum lesið mikið heima á þessum síðust og verstu. Auk þess hefur dagskráin margfaldast á síðustu mánuðum með tilkomu Sirkus. Samt er eins og enginn kveiki á því að það þurfi að fjölga fólki hér. En hvað um það. Nóg að gera en Auður er hvort eð er að lesa undir próf þannig að það er ágætt að lesa þetta heima og fá aukapening. Stundum er maður algjör nörd í þessu. Til dæmis var ég að lesa LOTR III og Harry Potter heima um daginn. Þá tók maður fram bækurnar til að geta borið saman textann í myndinni og bókinni. Það er nördaskapur.

Óli Gneisti er með eitthvað svona dót á síðunni sinni þar sem maður á að setja nafnið sitt í athugasemdakerfið hjá honum og hann gerir eftirfarandi:
1. Ég segi þér eitthvað handahófskennt um þig.
2. Ég segi þér hvaða lag/mynd minnir mig á þig.
3. Ég segi þér hvaða bragð minnir mig á þig.
4. Ég segi þér fyrstu ljósu minninguna mína af þér.
5. Ég segi þér á hvaða dýr þú minnir mig á.
6. Ég spyr þig að einhverju sem ég hef velt lengi fyrir mér um þig.

Í staðinn setur maður niðurstöðurnar á bloggið hjá sér. Nú tek ég skýrt fram að ég ætla EKKI að gera það sama, til þess hef ég ekki nógu mikið hugmyndaflug. En hér koma niðurstöður Gneistans ásamt athugasemdum frá mér:
1. Þú ert ekki mesti aumingjabloggari í heimi (Þetta er alveg rétt. Til eru verri menn en ég. Til dæmis ónefnd hjón í USA.)
2. Nici's naked hookers (??? Þetta getur ekki verið gott.Svo ég vitni í Pet Shop Boys "Hvað hef ég gert til að verðskulda þetta?")
3. Þú varst svoltið kók en getur núna verið fleiri brögð. (Skiljanlegt)
4. Þú og Arnór að fara eitthvað út að borða. (Enn þá skiljanlegra)
5. Þröstur. (Ég er einmitt lítill sætur fugl.)
6. Finnst þér Arnór ekki svoltið, þú veist, svona? (Hittumst við tækifæri og ræðum þetta betur.Ekki eru öll kurl komin til grafar.)

Þar sem að ég hef í sjálfu sér ekkert til að skrifa um ætla ég að fara yfir þá sem ég hef sett hér í blogglistann til hægri. Þetta eru í sjálfu sér tilganslaus skrif þar sem flestir þeir sem lesa þetta, og þeir eru nú ekki margir núna, þekkja hver annan. En þar sem ég hef ekkert að gera ætla ég nú samt að gera þetta og hananú.
Arnór: Vinnufélagi til margra ára, hjá Orkuveitunni og 365. Saman fórum við gegnum íslenskuna á okkar hraða sem hentaði ágætlega. Kynntumst fyrst í Þórsmerkurferð einhvern tímann þegar einhver benti okkur á að við hefðum báðir áhuga á NBA. Fórum saman til London eina helgi og sáum Patrick Vieira hrækja á Neil Ruddock. Það var gaman.
Atli:Fyrrverandi íslenskunemi. Hann setti athugasemdakerfið inn á síðuna hjá mér og læddi sér inn um leið sem er hið besta mál. Stórskemmtilegur bloggari sem gæðablaðið DV vitnar oft í.
Mummi: Fyrrverandi samstarfsfélagi á Nesjavöllum og all around good guy. Körfuboltafíkill sem heldur með Boston og Minnesota. Gaman að spila körfubolta við hann því við erum á sama leveli. Sagnfræðingur og stórsvöngvari.
Gunni og Solla Vinir sem búa í Bandaríkjunum. Í því landi hefur greinilega ekkert gerst frá 27. júní. Þau eiga dótturina Arndísi Dúnu sem ég kynntist aðeins í sumarbústaðaferð í vetur. Hún tók mér ekki vel í fyrstu en síðan vann ég greinilega á og við skemmtum okkur ágætlega Gunni er að læra stærðfræði en Solla verkfræði.
Líney: Uppáhaldsfrænka mín: Hún býr líka í Bandaríkjunum en þar virðist meira vera að gerast en í Bandaríkjunum sem Gunni og Solla búa í. Hún skrifar undir nafninu Big Bird eða BB. Hún er að læra efnafræði og verður bráðum virðulegur doktor í því.
Lilja: Lilju Rós hef ég þekkt frá því ég var 16 ára held ég. Hún og Líney æfðu borðtennis saman og við kynntumst í gegnum hana. Hún er reyndar líka frænka mín en þar sem hún er fjarskyldari mér en Líney þá getur hún ekki verið uppáhalds. Maðurinn hennar heitir Gísli og var með Gunna í bekk og ég þekkti hann áður en þau Lilja fóru að vera saman. Þau eiga Írisi Önnu sem er í nöp við mig eftir að ég barði hana óvart í hausinn einu sinni. Svo er annað barn á leiðinni. Uppáhaldsmyndir okkar Lilju eru Back to the Future 1 og 2 en ekki 3 því við myndum aldrei horfa á hana. Á þessu bloggi skrifa hún og vinkonur hennar saman. Þar sem að ég kannast við þær flestar er þetta ágætis skemmtun.
Óli Gneisti: Var sumarafleysingamaður á spólusafninu á 365 í sumar. Queen-aðdándi dauðans. Er líka í þjóðfræði og bráðskemmtilegur bloggari. Syngur líka My Fair Lady fallega.
Málbeinið:Gísli Ásgeirsson, þýðandi á Stöð tvö og Framsóknarvinur nr. 1. Bráðskemmtilegur bloggari og þýðandi. Hann á til dæmis þessar gullsetningar í þýðingu 1) Í mynd um hestaveðreiðar "...en þýsku hestarnir urðu aftarlega á merinni." 2. Í þætti um kraftakeppni kvenna "Kanadísku stúlkurnar taka sér stöðu fyrir dráttinn." Þá kom hann með hugmyndina að orðinu "náriðill" í stað orðins "dauðariðill" í HM. Það var ekki samþykkt.
finnurtg: Eini maðurinn á listanum sem ég hef hvorki séð né talað við. Ég var eitt sinn að skoða Utah Jazz síðuna Jazzhoops.net og sá að þar var Íslendingur sem skrifaði oft. Svo sá ég að hann hélt mikið upp á Nick Cave eins og ég. Mjög virkur og skemmtilegur bloggari.
Þorri frændi: Kallar sig Mikka ref. Uppáhaldsfrændi minn og bróðir Líneyjar. Dómari eins og ég, bara ekki jafngóður. Einu sinni var hann litli óþolandi frændi en hefur vaxið úr grasi síðan. Einn besti vinur minn og maður sem gott er að tala við.


Þá er það komið. Ef það er einhver sem vill láta bæta sér inn á listann þá er bara að senda mér póst á oddbergur.eiriksson hjá 365.is eða setja inn athugasemd. Ég veit að það eru einhverjir sem lesa þetta sem rífa hár sitt og skegg af þvi að það er ekki hlekkur á þá. Eins er fólk er ósátt við það sem ég skrifaði hérna þá má það senda póst eða skrifa athugasemd. Ef að fólk les þetta má það líka setja athugasemd.

Þetta og þetta kemur í hús bráðum. Þá verður aldilis gaman hjá okkur. Vorum að spá í þessu en ég óttaðist að skyrtan færi Auði ekki nógu vel. Skoðum það betur seinna.

Við fórum í sumarbústað um daginn og hittum þar Kjarra, Laufeyju, Lárus Ármann, Borghildi, Aadne, Íshildi Ulvu, Sollu og Arndísi Dúnu. Var það hin besta ferð og gaman að sjá þá sem maður hefur ekki séð lengi. En mikið hafa þessar ferðir nú breyst með árunum. Að taka með sér litla kippu og klára hana ekki hefði einu sinni þótt mikil skömm. En ekki lengur.

Hér kemur hetjusaga af sjálfum mér. Ég var í vinnunni um daginn (1X2) og var um leið að lesa þátt fyrir hina vinnuna mína. Sá þáttur heitir Most Haunted og fjallar um þá staði í Bretlandi þar sem mestu reimleika er að finna. Ég sat inni í stóru rými, aleinn í húsinu og ég verð að játa að mér stóð ekki á sama þegar ég fór að heyra alls kyns hljóð frammi á gangi og af neðri hæðinni. Nú get ég ekki hælt mér af því að vera manna hugrakkastur þegar kemur að því að ganga einn í myrkri þannig að ég sat sem fastast og hreyfði hvorki legg né lið til að athuga hvort eitthvað væri á seyði. Enda var þetta eintóm ímyndun í mér en sýnir bara að það er ekki nóg að banna kvikmyndir og tölvuleiki heldur þyrfti einnig að banna sumt það efni sem ég þarf að lesa í vinnunni innan 30 ára. Eða fullvissa mig um að draugar séu ekki til.

Við fengum næturgest um daginn og var það hin besta skemmtun. Við máluðum, föndruðum og lékum okkur saman. Svo mátti bara ég leika við hana. Eitthvað ruglaðist hún í ríminu þegar ég vaknaði og hélt þvi fram fullum hnefum að ég væri án klæða, sem var alls ekki rétt þar sem ég var í fallegum, grænum náttbuxum. Ég föndraði fallegan jólakött sem hefur vakið mikla lukku meðal gesta og er stórkostleg prýði að honum þar sem hann situr ofan á sjónvarpinu.

Hvað skildi nú hafa drifið á daga mína síðustu daga? Eftir að hafa hvílt mig mikið eftir NBA-spána hóf ég aftur störf og allt gekk sinn vanagang. Undanfarna daga hef ég mikið reynt mig við hinar ýmsu bókmenntagetraunir, til dæmis hér og hér með misgóðum árangri. Í annarri hefur allt gengið framar vonum en hinni ekki. Í þeirri þar sem maður þarf að vita hlutina get ég ekkert en þar sem er hægt að gúggla þá gengur mjög vel og ég get bráðum opnað bókasafn það sem ein bók verður lánuð út. Í framhaldi af því vil ég mæla eindregið með bókum Viktors Arnars og ég hlakka til að lesa þá nýjustu. Þýðingar Gísla les ég hins vegar á hverjum degi mér til mikillar ánægju.

Þá er komið að því sem sumir hafa beðið eftir lengi, NBA-spánni. Nú þegar maður hefur aðgang að NBA TV er eðlilegt að maður standi sig betur en í fyrra (förum ekki nánar út í það). En semsagt, hér kemur það.

MVP

Mummi kallar hann "The Big Predictable". Tim Duncan er langbesti maðurinn í einu besta liðinu. Þó að hann sé ekki fansísmansí þá virkar hann. Aðrir sem koma til greina: Dwayne Wade, LeBron James, Kevin Garnett, Shaq, Dirk Nowitski, Steve Nash.

NBA-lið ársins
1. lið

C. Shaq - Enginn annar kemur til greina.
F. Kevin Garnett - Gæti dottið niður í annað liðið ef Minnesota gengur illa.
F. Tim Duncan - Besti forwardinn í deildinni.
G. Steve Nash - Phoenix-liðið verður enn þá gott og hann heldur því á floti
G. Kobe Bryant - Ekki það að ég vilji hafa hann þarna en reikna með að hann verði valinn af gömlum vana.

2. lið
C. Yao Ming - Næstbesti senterinn
F. Dirk Nowitski. - Gæti slegið Garnett út ef Dallas gengur vel og Minnesota illa.
F. Jermaine O'Neal - Indiana verður mjög gott og hann nýtur þess.
G. Dwayne Wade - Fáránlega góður. Gæti komist í fyrsta liðið ef Miami spilar vel.
G. LeBron James - Sama gildir um hann og Wade. Gæti slegið Nash eða Bryant út.

3. lið
C. Ben Wallace. Fulltrúi Detroit, aðrir senterar koma varla til greina.
F. Ron Artest - Ef hann lemur ekki neinn.
F. Andrei Kirilenko - Eins og Mummi er ég með sentimental pick. Besti varnarmaður deildarinnar.
G. Ray Allen - Besta skytta deildarinnar.
G. Tracy McGrady - Fíla hann ekki en hann skorar það mikið að hann kemst inn.

On the bubble: Shawn Marion, Allen Iverson, Jason Kidd, Michael Redd, Gilbert Arenas, Emmanuel Ginobili, Pau Gasol.


Nýliði ársins.
Andrew Bogut. Milwaukee verða góðir og hann mun eiga stóran þátt í því. Chris Paul kemur líka til greina því hann mun vera með fínar tölur en liðið hans sökkar. Deron Williams byrjar hægt en kemur svo sterkur inn í lokin.

Nýliðalið

C. - Andrew Bogut
F. - Sean May
F. - Danny Granger
G. - Deron Williams
G. - Chris Paul

Varnarmaður ársins

Andrei Kirilenko. Frábær perimeter-varnarmaður og getur blokkað rúmlega 3 skot í leik og stolið rúmlega tveimur boltum. Hefur vinninginn yfir Bruce Bowen, Ben Wallace og Ron Artest

Varnarlið ársins
C - Ben Wallace. Besti varnarmiðherjinn, án nokkurs vafa
F - Kevin Garnett. Frábær varnarmaður, stór og snöggur.
F - Andrei Kirilenko. Sjá hér að ofan.
G - Bruce Bowen. Ray Allen þolir ekki að spila á móti honum
G - Ron Artest. Stretch sem bakvörður en hefur þó spilað þar. Einn af þremur bestu varnarmönnum deildarinnar.

Sjötti maður
Sarunas Jasikevicius. Wild pick. Hann á eftir að verða þeim mjög mikilvægur þegar Jamaal Tinsley meiðist.

Þjálfari ársins
Jerry Sloan. Ég held að menn bíði eftir tækifæri til að kjósa hann þjálfara ársins. Ef Utah kemst í playoffs held ég að hann komi sterkur inn.

Framkvæmdastjóri
RC. Buford. Hann fékk Van Exel, Finley og Argentínumanninn ódýrt. Kannski Donnie Walsh hjá Indina, en ég hef meiri trú á Buford
Endurkoma ársins
Hér verð ég að vera sammála Mumma um að T.J. Ford sé líklegur. Nr. 2, Greg Ostertag (ef Sloan drepur hann ekki) Ef við erum að tala um most improved player segi ég að það sé Mehmet Okur sem verður frábær í vetur.
Vonbrigði ársins
Lið. Vonandi Denver Nuggets. Leikmaður. Kenyon Martin.

LVP
Ef við erum að tala um Least Valuable Person þá er það án efa Isiah Thomas. En þar sem að ég geri ráð fyrir að við séum að tala um Least Valuable Player þá verð ég að nefna Jerome James. Þegar Isiah Thomar borgar þér 50 milljónir eru góðar líkur á þvi að þú sökkir.
Lokastaða riðla:
Austurdeild
Atlantic
1. Boston - Fyrir Mumma. Þeir gætu þó komið á óvart. Framtíðin er þeirra
2. New Jersey - Eina liðið sem gæti ógnað Boston. Spurning hvað lykilmenn endast.
3. Philadelpha - Ef Webber og Iverson ná vel saman og eru heilir gæti allt gerst. Lítil breidd samt.
4. New York - Þeir eru heppnir að Toronto er í sama riðli.
5. Toronto - Eitt af þremur slökustu liðunum í deildinni. Allt í upplausn.

Central
1. Indiana - Besta liðið í austrinu.
2. Detroit - Stutt á eftir Indiana. Myndi ekki vilja mæta þeim í playoffs.
3. Milwaukee - Stórskemmtilegt lið. Fíla Bogut og Ford.
4. Cleveland - LeBron er frábær en spurning með aðra.
5. Chicago - Gæti þess vegna náð þriðja sætinu í riðlinum. Spurning hvort þeir nái að fylla í skarð Currys.

Southeast
1. Miami - Langbesta liðið í riðlinum, ef allt gengur upp. Gæti þó verið gangandi tímasprengja.
2. Washington - Langnæstbesta liðið í riðlinum. Arenas er flottur.
3. Orlando - Svo að ég noti orð Mumma "Boring"
4. Charlotte - Gætu orðið þokkalegir eftir 2-3 ár. Ekkert spes núna samt.
5. Atlanta - Lélegasta liðið í deildinni.

Vesturdeild
Southwest
1. San Antonio - Sennilega besta liðið í deildinni.
2. Houston - Of hypaðir en sennilega góðir samt.
3. Dallas - Gott lið en þessi riðill er sennilega sá besti í deildinni (og Central)
4. Memphis - Sama og með Dallas. Pau Gasol er drullugóður
5. Hornets - Gefum þeim nokkur ár. Paul verður góður, samt ekki jafngóður og Deron Williams (svipað og Marbury vs. Kidd)
Northwest
1. Denver - Þoli ekki þetta lið en á pappírnum er þetta sterkasta liðið í riðlinum
2. Utah - Get ekki sett þá neðar. Okur er stjarnad og Kirilenko ótrúlegur. Boozer er???
3. Minnesota - Garnett einn og sér kemur liðinu svona hátt.
4. Seattle - Ná ekki að fylgja árangri síðasta árs eftir. Eiga eftir að sakna Daniels. Of margir Free agents
5. Portland - Helmingurinn af liðinu má ekki vera úti eftir kl. 8 og hinir eru villimenn og vitleysingjar. Sjáumst eftir 4-5 ár.
Pacific
1. Phoenix - Spurning hvenær Stoudemire hvenær aftur. Samt bestir í riðlinum.
2. Sacramento - Ekki mikil breidd en gott starting five
3. Clippers - Verða í baráttunni um playoffs. Cassell bætir liðið mikið.
4. Golden State - Hypaðir en ekkert sérstakir. Davis meiðist og þá er allt búið.
5 Lakers - Þeir sökka. Kwame Brown sökkar og þeir sökka allir
Playoffs
Austur
1. Indiana
2. Miami
3. Boston
4. Detroit
5. New Jersey
6. Washington
7. Milwaukee
8. Cleveland

Vestur
1. San Antonio
2. Phoenix
3. Denver
4. Houston
5. Dallas
6. Sacramento
7. Utah
8. Memphis

Undanúrslit
Detroit - Miami 4-3
San Antonio - Phoenix 4-1
Meistarar
Same old, same old. San Antonio- Detroit 4-2

Hægt er að fylgjast með ferðum Mikka refs í Seattle á Netinu. Einnig er kominn hlekkur hér til hægri fyrir þá sem þekkja til.

Ég sá að Arnór bætti mér aftur inn á listann yfir virka bloggara. Það er mikill heiður sem ég verð að standa undir. Það hefur þó ekki mikið gerst hjá mér, síðustu tvo miðvikudaga hef ég verið sendur í neðra eins og það kallast hér á Lynghálsinum, en þá var ég sendur í Skaftahlíðina til þess að lesa úrvalstímaritið Sirkus (hóst, leiðindi, hóst). Þar hitti ég Arnór fyrir annan daginn og við rifjuðum upp gamla tíma og fórum á Subway. Síðasta sunnudag fórum við Auður svo með Sóleyju, litlu frænku Auðar, í smábíltúr. Við fórum og fundum hesta og gáfum þeim brauð og Sóley ætlaði að gefa hestunum snuðið sitt en guggnaði svo á því á síðustu stundu. Svo fórum við niðrí fjöru einhvers staðar og hittum á svona ljómandi skemmtilegan mann sem hótaði okkur öllu illu ef við hypjuðum okkur ekki af einkalóð hans og spurði meðal annars hvort við ætluðum að halda því fram að hann mætti ekki vera á lóðinni. Sóley fór að gráta og ég var nálægt því að grafa manninn á þessari einkajörð hans en það hefði verið of gott fyrir þennan mann, ef mann skyldi kalla (Tilv. ?Maðurinn ætlaði að borða Sóleyju!? Gaman að því. Svo fengum við ís og allt varð gott. Þá komu Helgi, Anna Kristín og Anna Alexandra í heimsókn og þá varð allt enn betra. Lokaorð þessa dags hjá Sóleyju voru: ?Oddbeggu, fú ert kúkalabbi.? Svo mörg voru þau orð.

Man ekki hvað ég ætlaði að skrifa, bendi bara á þetta fyrir þá sem nenna ekki að sinna vinnunni sinni.

Risk
Bubbles

Um margra ára skeið hef ég verið þekktur sem mikill kókisti. Árum saman drakk ég u.þ.b. 1,5 lítra af kóki á dag og þótt ekki mikið mál. Þá mátti ekki sjá neitt diet-drasl og Pepsi var sending frá djöflinum.Nú eru tímarnir aðrir. Ég er að vísu ekki hættur að drekka kók en það hefur minnkað mikið og í staðinn er ég farinn að drekka Pepsi-Max. Það er ekki auðvelt fyrir mig að skrifa þetta en þetta er engu að síður staðreynd. Það er nú ýmislegt sem spilar þanna inn í en það er engin afsökun. Mér líður eins og versta föðurlandssvikara. Skamm. Svona gera menn ekki...

Margt hefur gerst síðan síðast, meðal annars það að við fengum íbúðina afhenta kl. 17.00 föstudaginn 2. september. kl. 1.00 aðfaranótt laugardags vorum við næstum búin að mála eina umferð á alla íbúðina. Kl. 22 á laugardagskvöld var búið að mála tvær umferðir á alla íbúðina. Kl. 20 á sunnudagskvöld vorum við flutt með allt okkar hafurtask og seint á mánudagskvöldi var búið að taka upp úr öllum kössum og koma öllu fyrir. Þetta er sennilega heimsmet í flutningum.

Við erum enn að bíða eftir að fá íbúðina okkar en það fer að styttast í þetta. Við reiknum með að fá hana á föstudaginn og þá er fólk velkomið í heimsókn til þess að skoða og mála ef það langar til. Sem betur fer þarf ekki að gera mikið, vonandi að ein umferð af málningu dugi á alla íbúðina. En sem sagt, allir eru velkomnir að skoða... vííííííí

Vorum að skrifa undir kaupsamning að nýja húsinu okkar í dag. Festum kaup á íbúð í Ljósuvík í Grafarvoginum. 95 fermetrar, þriggja herbergja öll úr gulli og verðmætum eðalsteinum. Nánari upplýsingar síðar.

Ég fer í fríið, ég fer í fríið, ég fer í fríið... Það er rétt, ég mæti í vinnuna á morgun, fimmtudag en tek svo sjö vinnudaga í frí og en á því tímabili eru tvær helgar þannig að þetta er í raun 11 daga frí. Jibbí skibbí. Enn sem komið er hefur ekkert verið ákveðið hvað á að gera en líklega skreppum við eitthvað vestur í tvo eða þrjá daga. Svo verður eitthvað sofið og slappað af. Ætli maður reyni ekki eitthvað að skoða íbúðir í leiðinni og bara allt það sem manni dettur í hug. Ég á þá enn 5 daga eftir sem ég get tekið í vetur eða þegar við kaupum nýja íbúð.
Svo ætla ég að óska bæði Reykjavíkurborg og Gunna til hamingju með afmælið á morgun. Sennilega gleymi ég að spjalla við Gunna á morgun þannig að ég ætla að tryggja mig núna. Til hamingju með morgundaginn, Gunni!

Vegna fjöla fyrirspurna hér í athugasemdunum er hér update frá íbúðaleit. Enn sem komið er höfum við ekkert fundið. Við erum að leita að einhverju nýrra í Reykjavík sem er svipað stórt. Hverfið skiptir í sjálfu sér ekki máli en þar sem að það eru nú ekki mörg hverfi með nýjum íbúðum þá útilokast nokkur af sjálfu sér. Við höfum skoðað í Grafarvogi, Grafarholti og eins á landsbyggðinni (Kópavogi). Annars er í sjálfu sér ekkert útilokað.

Margir vina minna muna eftir því að ég var aldrei góður í biðröðum. Það virtist vera sama hvernig röðin var, alltaf tókst mér að verða á eftir öllum öðrum að fá afgreiðslu. Stundum tróðst fólk fram fyrir mig, stundum var eins og afgreiðslufólk tæki ekki eftir mér og merkilega oft tókst mér að velja þá þar eitthvað vandamál myndaðist, kortið hjá einhverjum virkaði ekki, gamlan mann vantaði athygli o.s.frv.
Fór það svo að fólk sá aumur á mér og bauðst til þess að fara í röðina fyrir mig sem ég yfirleitt þáði. Nú skyldi maður halda að ég væri að segja frá þessu vegna þess að eitthvað hefði breyst eða ég væri að fara að segja einhverja skemmtilega raðarsögu. Svo er ekki. Allt er við það sama.

Ég ætlaði að fara að blogga um NBA-spána sem við Arnór og Mummi settum fram hér fyrir um ári en nennti því svo ekki. Læt nægja að segja að ég reið ekki feitum hesti frá þessu. Annars er það helst að frétta að við erum búin að selja íbúðina og erum því heimilislaus sem stendur. Leit stendur yfir og gengur þolanlega. Myndi þó ganga betur ef fólk hætti ekki við að selja í miðjum klíðum. Er að lesa Harry Potter. Spennandi.

Svaf yfir mig í morgun sem er merkilegt þar sem ég þurfti ekki að mæta fyrr en klukkan 11. Ástæðan? Framlenging og vítaspyrnukeppni í leik Hauka og Þróttar í bikarnum í gær. Komst ekki heim fyrr en rúmlega 23.00 og gat svo ekki sofnað næstu fjóra tímana vegna þreytra lappa. Er svo að dæma í kvöld í utandeildinni. Líklegt má telja að ég fari ekki mikið út úr miðjuhringnum í þessum leik. Svo er ég líka svo óvanur að dæma sjálfur að sennilega mun ég ekkert vita hvað ég á að gera.
Núna er ég á fréttastofunni að lesa yfir fréttirnar. Ekki að það sé sérstaklega fréttnæmt... Heyrumst síðar

Eins og margir vita hef ég dundað mér við það undanfarin ár að hlaupa með fána í hendinni á fótboltavellinum og uppskorið og svívirðingar áhorfenda og leikmanna í staðinn. Núna um daginn náði ég merkilegum áfanga því í síðust niðurröðun frá KSÍ fékk ég tvo leiki í efstu deildinni. Fimmtudaginn 30. júní verð ég á leik Keflavíkur og Grindavíkur í Keflavík og þriðjudaginn 26. júlí verð ég á leik Grindavíkur og ÍA í Grindavík. Þó að þetta séu svona opinberlega fyrstu leikirnir mínir í efstu deild hef ég þó verið viðriðinn einn leik áður. 2. ágúst 2001 var ég nýkominn heim úr vinnunni og hafði keypt mér hamborgara og franskar hjá Lilju í Staldrinu. Ég settist fyrir framan sjónvarpið um 19.30 til að horfa á leik KR og FH sem átti að hefjast þá kl. 20.00. Ég var varla búinn að kyngja síðasta bitanum þegar síminn minn hringdi. Það var starfsmaður KSÍ sem var í vondum málum því það hafði gleymst að boða varadómara á leikinn. Hann sagði mér að bruna í einum grænum á KR-völlinn og redda málunum. Þarna var ég nýbúinn að gúffa í mig hamborgaranum og var satt að segja ekki til stórræðanna en sagði að sjálfsögðu já strax. Þegar ég var að leggja af stað mundi ég að það var nánast ekkert dót í töskunni minni, því ég hafði hent því öllum dómaragallanum mínum í þvottavél kvöldið áður. Ég var þó með stuttbuxur, sokka og upphitunarpeisu sem ég klæddi mig í áður en ég lagði af stað. Ég var mættur á KR-völlinn eina mínútu í 8 og lenti í vandræðum með að finna stæði og svo í smávandræðum með hliðvörðinn sem ætlaði ekki að hleypa mér inn og trúði mér varla þegar ég sagði honum að ég væri einn af dómurum leiksins, enda var leikurinn þá byrjaður. Það bjargaðist þó og kl. 20.03 var ég kominn á milli bekkjanna og reiðubúinn til að hefja störf. Það var u.þ.b. þá sem ég uppgötvaði að ég hafði litla hugmynd um hvað varadómari ætti að gera annað en að vera á milli bekkjanna. Því var það að alltaf þegar aðstoðardómarinn hljóp að miðjunni fór ég til hans og fékk ráð frá honum. Það dugði fram að hálfleik en fékk ég fyrirmæli frá dómaranum sem ég reyndi að fara eftir í seinni hálfleik. Allt gekk það svo sem að óskum og ég komst nokkuð stórslysalaust frá mínum fyrsta efstudeildarleik. En nú er semsagt alvaran fram undan. Allir í Grindavík 30. júní...

Myndir frá hreinsunardegi 365 eru hérna. Meira síðar

Svolítið síðan ég skrifaði síðast. Ég var í sumarfríi í síðustu viku og hluta af þessari og afrekaði að gera nákvæmlega ekki neitt. Sumir gera eitthvað uppbyggilegt í fríunum sínum en ekki hann ég. Núna er Auður að sleikja sólina á Benidorm þannig að ég er grasekkill eins og er (held ég, skil ekki alveg hugtakið). Núna hefur þetta ástand varað í 36 tíma en það er strax orðið sýnilegt á heimilinu. Tómur pítsakassi (miklir snillingar eru þeir Domino's-menn að vera með megaviku einmitt á þessum tíma, tóm bjórflaska, og nammikassar á borðinu. Það vantar bara að ég sitji á nærbuxunum og í nærbol og horfi á sjónvarpið. En hver veit, klukkar er bara að slá í fimm (þeim sem finnst þetta orðalag skrýtið eða asnalegt er bent á að horfa á Ísland í bítið næsta mánudag þar sem Jóhanna ætlar að fjalla um þetta) og hver veit nema buxurnar og peisan fjúki þegar líður á daginn.

Þar sem að mér sýnist að ég sé bara að skrifa fyrir Hr. Tómasson þessa dagana þá er best að þessi færsla verði bara fyrir/um hann. Eitt sinn brugðu íslenskunemar sér í sumarbústað og eins og lög gera ráð fyrir fóru allir í pottinn. Síðan kom að því að fólk fór að fara upp úr pottinum en ekki gættu allir að því að pallurinn var flugháll enda miður vetur. Steig ein snótin upp úr pottinum og vildi ekki betur til en að hún flaug á hausinn við mikila skelfingu flestra, en þó ekki allra. Vildi einn karlmaðurinn hughreysta vesalings stúlkuna þar sem hún lá kveinandi á jörðinni og gerði það með þessum orðum: ?Hafðu engar áhyggjur, þú ert enn þá sexí.? Við þessi orð brutust út einhver þau mestu hlátrasköll sem undirritaður hefur heyrt og fór Hr. Tómasson þar fremstur í flokki og lá við stórslysi þegar undirrituðum svelgdist allsvakalega á bjór þegar hlátursrokur Tómassonar urðu hvað hæstar. Ekki mátti nokkur maður vera að því að sinna vesalings stúlkunni sem lá á pallinum en sem betur fer var hún ekki mikið slösuð þó stoltið væri nokkuð sært. Þetta var saga vikunnar, bara fyrir Hrt. Tómasson. Öðrum sem ekki voru á staðnum finnst þessi saga sennilega ekkert sérstaklega fyndin en þetta er líklega það fyndnasta sem ég hef nokkurn tíma orðið vitni að.

Þegar ég var að skrifa lokaritgerðina mína í M.Paed.náminu sat ég oft í Árnagarði fyrir framan tölvuna og hlustaði á tónlist á meðan ég þóttist vera að skrifa. Meðal þess sem ég hlustaði á var íslensk hljómsveit sem heitir Misery loves company. Þegar ég svo útskrifaðist gleymdi ég að bjarga þeim gögnum sem ég átti inn á heimasvæðinu og þar á meðal þessum lögum sem ég hlustaði svo mikið á. Nú fyrir skömmu hóf ég mikla rannsóknarblaðamennsku til þess að finna þessi lög aftur. Sú rannsókn leiddi mig á slóðir Eyvindar nokkurs Karlssonar sem er annar tvegja meðlima hljómsveitarinnar. Ég sendi honum tölvupóst þar sem ég spurðist fyrir um þessi lög og hann svaraði um hæl og niðurstaðan varð sú að hann ætlar að brenna fyrir mig á disk allt það efni sem hann á með þeim og þakka ég honum kærlega fyrir það. Sem þakklætisvott sett ég hérna hlekk á heimasíðu hans og heimasíðu hljómsveitarinnar. Endilega kynnið ykkur lögin þeirra. Flott lög og góðir textar. Eðal þunglyndi.

Hr. Tómasson (við þurfum að hittast fljótlega aftur í góðra vina hópi og rifja upp gamlar, góðar sögur) benti mér á í athugasemdunum að ég bloggaði bara á miðvikudögum. Til að festast ekki í viðjum vanans ákvað ég að bylta venjum mínum og blogga núna á föstudegi (þori að veðja að þið sáuð þetta ekki fyrir.) Það er nú ekki mikið að frétta síðan síðast nema kannski það að við Auður vorum að kaupa okkur nýtt sjónvarp. Við fórum í ELCO í Smáranum og fundum þar þetta fína Sony 29" tæki sem okkur leist vel á. Afgreiðslumaðurinn tók niður nöfnin okkar og sagði okkur að fara á lagerinn sem er í IKEA-húsinu og sækja tækið þar og borga það. Þegar við komum þangað Var okkur sagt að við hefðum átt að borga tækið í búðinni og fá kvittun til að koma með á lagerinn. Þar sem nálgast var lokun ákváðum við að fara í Elco í Skeifunni til að sjá hvort ekki væri til svona tæki þar. Hitti þá svo vel á að einhver hafði nýtt sér 30 daga skilafrest og var að skila nákvæmlega svona tæki. Það var okkur boðið með 10.000 króna afslætti. Við þáðum það strokuðum afgreiðslumanninn í Smáranum út af dauðalistanum. Nú erum við sem sagt stoltir eigendur nýs sjónvarps og Auður þarf ekki lengur að horfa á sjónvarpið með gleraugun eða spyrja mig á 10 sekúndna fresti hvað sé að gerast því hún sjái ekki á sjónvarpið.

Enn eitt dæmið um það að maður sé orðinn töluvert gamall. Ég þurfti að fara til læknis í dag. Heimilislæknirinn minn var veikur (vond auglýsing fyrir læknastéttina) þannig að ég var spurður hvort mér væri ekki sama þó að ég fengi annan lækni. Ég sagði að mér væri alveg sama og var þá vísað til læknis sem heitir Pétur. Þá kom í ljós að Pétur þessi er jafn gamall mér og gamall kunningi sem var í X-bekknum í MR. Mér hefur alltaf fundist læknar vera svo gamlir en þarna var sem sagt læknir sem var jafn gamall og ég. Hins vegar ber þess að geta að hann var mjög fagmannlegur og ég á von á því að leiðbeiningar hans hjálpi mér. Skemmtilegt þetta.

Fórum í sumarbústað um helgina. Ég var eitthvað að spjalla við mömmu og ég minntist eitthvað á að það væri gaman að fá sumarbústað einhverja helgina. Fimm mínútum seinna hringdi mamma aftur og sagði að nánast allir bústaðir Búnaðarbankans væru lausir þessa helgina vegna árshátíðar starfsmanna. Við tryggðum okkur bústað í Húsafelli og brunuðum af stað um miðjan föstudaginn. Við tókum systkini Auðar með okkur þannig að við vorum fimm sem fórum og síðar um kvöldið komu svo Þóra, frænka Auðar og Árni kærastinn hennar. Við byrjuðum á því að steikja hamborgara ofan í allt liðið og reyndum svo að tengja afruglarann sem við tókum með okkur. Það olli nokkrum vandræðum að fjarstýringarnar í bústaðnum voru fleiri en tækin þannig að það tók nokkurn tíma að átta sig á hvaða fjarstýring átti við hvaða tæki. Loks tókst það en þá kom í ljós að stafrænu útsendingarnar nást ekki við hálendi Íslands. En af því að ég vinn hjá svo góðu fyrirtæki þá hringdi ég þangað og fékk lánaðan afruglara af gömlu tegundinni sem Þóra og Árni komu með. Tók þá ekki betra við því allar fjarstýringar hússins lögðu þá niður vinnu og varð ekki haggað. Var þá ekki hægt að stilla afruglarann inn á sjónvarpið. Er hann nú úr sögunni. Lítið var gert um kvöldið, spjallað spilað lúdó farið í pottinn. Hið síðastnefnda varð nánast banabiti eins í hópnum en Árni vaknaði daginn eftir með himinháan hita, höfuðverk, hor og heilmikið annað. Þó fór nú allt á besta veg og heilu pilluglasi seinna var hann kominn á fætur aftur. En það bar helst til tíðinda á meðan að Vetur konungur kíkti í heimsókn og gerði sig heimankominn hjá okkur. Varð því lítið úr sólböðum en því meira af snjókasti og snjókallagerð. Þegar hér var komið við sögu voru menn orðnir svangir. Var þá tekið til þess ráðs að grilla. Ekki dugði minna en meðalbú á grillið fyrir þennan hóp og tók það sinn tíma. Þá voru grilluð um tvö kíló af kartöflum þar sem sumir höfðu áhyggjur af því að þeir fengju ekki nóg. Undirritaður var grillmæster og beitti Hómerískum töktum með grillolíuna. Ekki veitti af hitanum þar sem úti var stórhríð og grillið ekki í miklu skjóli. Mátti undirritaður því nopra úti í kuldanum meðan aðrir sátu inni í hlýjunni. Allt fór þó vel fram. Fór svo í lokin að ekki var nægur hiti á grillinu til þess að grilla bananana sem áttu að vera í eftirrét (enda hafði þá snjóað töluvert ofan í grillið) Tók grillmeisterinn þá til þess ráðs að klára úr ólíubrúsanum á grillið og flambera bananahelvítin. Var gerður góður rómur að því. Leið svo kvöldið líkt og hið fyrra og fer ekki fleiri sögum af því. Á sunnudaginn var borðað, þrifið og svo brunað í bæinn þar sem í Egilshöllinni beið knattspyrnuleikur sem ekki gat farið fram án undirritaðs. Lauk þar með ferðinni.

Þá er páskafríið fram undan. Dagskráin er eitthvað á þessa leið:
Fimmtudagur. Fara yfir verkefni fyrir Tjáningu og samskipti.
Föstudagur. Þarf að mæta í vinnuna á hádegi til að lesa smá texta. Tekur u.þ.b. hálftíma en er fjögurra tíma útkall á stórhátíðardegi. Fer svo að fara yfir verkefni.
Laugardagur. Fara yfir verkefni. Mæta í fréttastofuna frá 16-18.30
Sunnudagur. Borða páskaegg. Fara yfir verkefni.
Mánudagur. Fara yfir verkefni og skila þeim ef guð lofar.

Það er því frábært páskafrí fram undan

Hvað eiga orðin fyrrverandi, verð, tölva, 8. áratugurinn sameiginlegt með orðatiltækinu að berast á banaspjóti og slóðunum www.ismal.hi.is, www.lexis.hi.is, visindavefur.hi.is. Og hvað á allt þetta sameiginlegt með eignarfalls-essi í landaheitum og beygingu á fyrirtækjanöfnum og mannanöfnum. Jú, þökk sé mér að nú mun enginn maður á Íslandi tala einhverja vitleysu hvað varðar þessi atriði. Ég var sem sagt í Íslandi í bítið í morgun sem og fyrir hálfum mánuði og fræddi lýðinn um íslenska tungu. Þetta hefur nú gengið ágætlega og lýðurinn orðið margs fróðari auk þess sem frægð mín út á við hefur aukist til muna. Þetta má til dæmis sjá á Veftíví á Vísi.is. Þar sem að ég hef farið þrisvar sinnum og verið fimm mínútur í senn þá má segja að hafi öðlast mínar 15 mínútur af frægð. Þess vegna reikna ég með að leggja skóna á hilluna eftir þennan dag og því var þetta svanasöngur minn í sjónvarpi (í bili að minnsta kosti). Því hvet ég alla til þess að horfa á þetta á meðan tækifæri gefst. Eða sleppa því, það meikar ekki diff hvort eð er. Það er allt á leiðinni til andskotans.

Þá eru bara 364 dagar í næsta afmælisdag. Ég fékk fínar gjafir, náttbuxur og LOTR frá Auði og péninga frá pabba og mömmu. Þegar ég kom svo heim úr vinnunni í gær þá beið mín þar þessi fína kaka sem Auður hafði bakað fyrir mig. Ég hafði að vísu ekki mikinn tíma til að borða hana þar sem ég þurfti að fara í næstu vinnu en engu að síður var þetta mjög skemmtilegt. Svo langar mig til að þakka öllum þeim sem glöddu mig með hugljúfum afmæliskveðjum. Takk takkk

Ég er að verða sérfræðingur í dren- og skólplögnum þar sem verið er að skipta um þetta drasl í kringum húsið okkar. Á mjög óformlegum húsfundi var ákveðið að íbúarnir myndu gera þetta sjálfir að eins miklu leyti og hægt væri. Þess vegna hef ég staðið úti í skurði síðustu daga með skóflu í hendi og mokað sandi eins og óður maður. Reyndar er það haugalýgi að ég sé að verða sérfræðingur í þessu þar sem ég botna bókstaflega ekkert í því sem þessir menn eru að gera. En sem betur fer eru nágrannarnir helvíti lúnknir við þetta og því kemst ég upp með að vita ekkert í minn haus. En þetta er samt lúmskt gaman og ágætt að kynnast nágrönnunum betur. Við erum farin að kynnast fólkinu á neðri hæðinni ágætlega þar sem við þurfum alltaf að fara inn um kjallarann og í gegnum íbúðina hjá þeim til þess að komast inn til okkar. Þetta stafar af því að búið er að grafa ca 1,5 djúpan skurð með allri framhlið hússins og við það hrundu einhverjar tröppur þannig að núna er nánast vonlaust að komast upp tröppurnar. Það hefur verið rætt um að að allar hurðir á milli íbúðanna verði teknar niður og þetta verði allt eitt stórt sambýli. Sú hugmynd er enn í nefnd.

Ég á afmæli á morgun. Þá verð ég 28 ára. Blóm og kransar afþakkaðir en pakkar vel þegnir.

Þetta skrifaði ég föstudaginn 20. febrúar 2004: Ég fór í bíb-testið á þriðjudaginn og komst að einu sem ég hefði svo sem getað sagt mér sjálfur. Maður á ekki að borða núðlusúpu áður en maður fer að hlaupa. Ég komst í 8-6 en þess má geta að það þykir góð fyrir einfætta konu sem er ólétt af tvíburum og er kominn 8 mánuði á leið. Ég fékk hins vegar tækifæri til að prófa aftur í gær og fór þá upp í 11-1 sem er fínt. Næst er það bara Reykjavíkurmaraþonið.
Þetta er í sjálfu sér ekki merkileg færsla nema hvað að núna á mánudaginn fór ég aftur í bíb-test. Maður hefði haldið að maður lærði af reynslunni en nei, auðvitað ekki. Mér tókst að belgja mig út af pulsum áður en ég fór að hlaupa. Mér fór að verða bumbult á 8. stigi en fékk ekki af mér að hætta því ef það er eitthvað leiðinlegra en að taka bíb-test þá er það að taka bíb-test tvisvar. Ég hætti í 12-3 en þá var ég farinn að jórtra eins og kýr. Gaman af því.

Gerði svolítið sem ég hef ekki gert í langan tíma, bjó til Cheerios-nammi. Þetta var eitt af því sem ég gerði alltaf þegar ég var lítill og langaði í nammi en átti engan pening. Maður hrærir saman flórsykur, kakó og brætt smjörlíki og blandar svo leðjunni við Cheerios, Corn Flakes eða Rice Krispies. Á þessum tíma kunni ég tvær uppskriftir, þetta og Royal-skyndibúðing. Þessu skaut allt í einu upp í kollinn á mér um daginn og ég varð bara að prófa þetta aftur. Þetta er sama snilld og mig minnti.

Ég er orðinn sjónvarpsstjarna. Í morgun kom ég fram í Íslandi í bítið og hélt þrumandi skammarræðu yfir landsmönnum um að þeir skyldu nú ekki voga sér að rugla saman fyrrum og fyrrverandi, ekki gleyma að setja eignarfalls -s á landaheiti í hvorugkyni, ekki segja áttundi áratugurinn þegar verið er að tala um 1980-1990 og ekki segja berjast á banaspjótum heldur berast á banaspjóti. Þetta gekk mjög vel og undirtektirnar voru gríðarlegar. Mamma sagði að ég hefði verið mjög sætur og pabbi vöknaði þegar hann sá mig. Þetta var falleg stund.

Í dag er febrúar og þá á ég afmæli. Ekki alveg í dag að vísu heldur þann 23. Þá verður gaman. Auður er að vísu skelfingu lostin því hún heldur að hún hafi fundið grátt hár á hausnum á mér. Ég sannfærði hana um það að þetta væri bara birtan og að það væri miklu líklegra að ég yrði sköllóttur en gráhærður en það virtist ekki gleðja hana mikið. Í gær fengum við nýja nágranna þegar leigjendurnir í kjallaranum fluttu út og eigendurnir fluttu inn. Þá kom í ljós að þessir nágrannar eru ekki alveg nýir, a.m.k. ekki hvað mig varðar. Þannig er að þegar ég bjó í Súluhólunum bjó fjölskylda í Ugluhólunum þar sem voru tveir strákar á svipuðum aldri og við Helgi, þeir Finnur og Pétur Bjarnasynir. Síðan fluttu þau en ekki langt eða bara upp í Krummahóla. 4-5 árum síðar fluttum við líka í Krummahólana, og vorum þá í sama húsi og á sömu hæð og þau. 12-13 árum síðar fluttum við í Ásgarðinn og sama sumar flutti þessi fjölskylda einnig. Nú var sem sagt fólk að flytja í kjallarann og viti menn, það er að Finnur og kærastan hans sem birtust á tröppunum hjá okkur í gær. Þetta er sem sagt í þriðja sinn sem við verðum nágrannar og ég verð að segja að ég tel mig ansi heppinn með nágranna á Langholtsveginum (nema akkúrat þessa dagana því Finnur og kærasta eru að brjóta niður veggi og breyta hjá sér og fjöskyldan fyrir neðan okkur er að endurnýja eldhúsið hjá sér og virðist helst nota loftpressu til verksins).

Í dag eignuðust vinir mínir, þau Lilja og Gísli, litla stelpu sem væntanlega verður nefnd Þorlákína í tilefni dagsins. Ég óska þeim til hamingju og óska um leið öllum gleðilegra jóla og farsældar á komandi ári.

Þá er komið að NBA spánni fyrir 2004-2005 tímabilið. Mummi og Nóri munu einnig birta sínar spár og lok tímabilsins verður spáin gerð upp og sá sem tapar verður húðstrýktur á almannafæri og settur í gapastokk. En hér kemur spáin...

MVP

Tim Duncan (Spurs). Spurs verða bestir og hann er besti leikmaður liðsins. Fær þó harða samkeppni frá Garnett.

NBA-lið ársins

Fyrsta lið:
C. Shaquille O?Neal (Miami) Hver annar?
F. Tim Duncan (San Antonio) Sá besti
F. Kevin Garnett (Minnesota)Hugsanlega líka sá besti
G. Kobe Bryant (Lakers) Af því að hann verður hér hvað sem hann gerir
G. LeBrin James (Cleveland) Ekki að hann eigi það skilið en hann er bara svo vinsæll

Annað lið:
c. Yao Ming (Houston) ? Áberandi næstbesti centerinn
F. Jermaine O?Neal (Indiana) ? Ef Duncan og Garnett væru ekki svona fáranlega góðir væri hann ofar.
F. Andei Kirilenko (Utah) ? Springur út í vetur
F. Tracy McGrady (Houston) ? Af gömlum vana
F. Allen Iverson (Philadelphia) ? Af gömlum vana
Þriðja lið:
C. Ben Wallace (Detroit) ? Hver annar?
F. Peja Stojakovic (Sacramento) - Skorunarvél og er í þokkalegu liði
F. Dirk Nowitski (Dallas) - Skorunarvél og er í þokkalegu liði
G. Jason Kidd (NJN) Fer samt eftir því hvað hann spilar mikið
G. Michael Redd (Milwaukee) Sleeper

Nýliði ársins

Emeka Okafor (Charlotte) ? Ekki mikið af impact leikmönnum í þessu drafti. Hann virðist vera tilbúinn ólíkt mörgum öðrum nýliðim sem þurfa 2-3 ár til að sanna sig. Hann vinnur því helst vegna þess að aðrir eiga það ekki skilið.
Nýliðalið ársins
Ég leyfi mér að nota orð Mumma hér:
?Vá, þetta er erfitt val. Þetta verður eflaust ágætur árgangur síðar meir, en nú í ár eru svo margir ungir og óreyndir að það er mjög erfitt að spá fyrir um þetta. Í raun er þetta helst spurning um hverjir fá að spila eitthvað í vetur.?
Gæti ekki sagt það betur sjálfur.

Fyrsta lið:

Emeka Okafor (Charlotte) Ef hann er besti nýliðinn hlýtur hann að vera í nýliðaliðinu
J.R. Smith (Hornets)Þekki svo sem ekki mikið til hans en heyrði að hann væri mögnuð skytta
Andrei Iguodala (Philadelphia) Byrjar inn á í vetur. Held að hann sé mjög solid
Devin Harris (Dallas) Byrjar væntanlega inn á. Verður með fínar tölur.
Ben Gordon (Chicago) Á eftir að skora mikið en verður með lélega hittni
Annað lið:
Al Jefferson (Boston) Hef trú á þessum strák, verður solid á 1. ári
Dwight Howard (Orlando) Mun standa sig ágætlega á 1. ári en ekkert stórkostlegt
Beno Udrih (Spurs) Spurs hafa lag á að fá góða erlenda leikmenn aftarlega í valinu, sbr. Tony Parker
Luol Deng (Chicago) Solid, en 9-10 stig, 4 fráköst 1-2 stoðsendingar
Dorrell Wright (Miami) Þekki ekki mikið til hans en hann spilaði ágætlega í pre-season held ég

Varnarmaður ársins

Andrei Kirilenko (Utah) Verður á topp 3 listanum yfir stolna bolta og varin skot + að taka 8-10 fráköst

Varnarlið ársins

Ben Wallace (Detroit) ? Augljóst
Kevin Garnett (Minnesota) ? Munar litlu á honum og Duncan
Andrei Kirilenko (Utah) ? Augljóslega
Bruce Bowen (San Antonio) ? Spyrjið bara Ray Allen
Ron Artest (Indiana) ? Má færa rök fyrir því að hann sé SG

Sjötti maður ársins

Matt Harpring (Utah)- Mun skora í kringum 15 stig og taka 7-8 fráköst af bekknum

Þjálfari ársins

Stan Van Gundy (Miami). Jerry Sloan ætti að vinna þetta en ég hef grun um að hann geri það ekki því menn búast við of miklu af liðinu. Miami er tískulið sem allir fylgjast með.

Framkvæmdastjóri ársins

Joe Dumars (Detroit) - Antonio McDyess og Carlos Delfino verða góðir og Dumars er well respected.
Endurkoma ársins

Væri gaman ef það yrði Grant Hill en ég hef ekki trú á því. Væri líka gaman ef það yrði T.J. Ford. Hann virkar fínn náungi. Tvö nöfn koma upp í hugann: Raef LaFrentz hjá Boston sem hefur verið meiddur lengi og Malik Rose hjá San Antoniosem hefur verið í hundakofanum hans Popovich. Mitt val. Malik Rose.

Vonbrigði ársins

Denver - Carmelo fer í fýlu, Camby meiðist, Martin lemur einhvern og verður dæmdur í bann.

LVP (Least Valuable Player)

Glenn Robinson. (Philadelphia) Fær allt of mikið borgað, spilar ekki vörn, er cancer í búningsherberginu og liðin hans vinna aldrei.

Playoff-lið, austan

Þrjú góð lið. Eitt þeirra gæti orðið (verður) hræðilegt ef (þegar) aðalmaðurinn meiðist. Svo gæti maður þess vegna dregið hin nöfnin úr potti.

Detroit - Vinnur Miðdeildina eftir harða keppni við Indiana
Miami - Vinnur Suðausturdeildina eftir harða keppni við ekki neinn
New York - Eftir 50 ár verður þetta talið lélegasta liðið til að vinna deild í NBA. Boston og Philadelphia gætu veitt þeim harða keppni um 1. sætið.
Indiana - Næst besta liðið í austrinu
Boston - Gætu orðið betri en maður heldur
Philadelphia - Menn búatst ekki við miklu af þeim og þeir gætu komið á óvart. Þurfa að losa sig við Glenn Robinson
Cleveland - Það er bara of mikið af lélegum liðum í austrinu. Eru með dísent stóra menn + LeBron. Ætti að duga.
Orlando - Eru með sæmilega breidd. Howard og Hill eru þó spurningamerki.

Bubble lið: New Jersey. Fer allt eftir Jason Kidd. Spilar hann? Verður hann seldur? Þetta gæti líka orðið hræðilega lélegt lið.

Playoff-lið, vestan

Spurs - Vinna Suðvesturdeildina örugglega
Minnesota - Vinnur Norðvestrið
Sacramento - Þó að þeir hafi dalað eru þeir samt þrusugóðir. Ostertag skorar 13 stig í leik og tekur 11 fráksöst. Jerry Sloan drepur hann.
Dallas - Nowitski og Finley eru enn þá þokkalegir. Dallas verður erfitt
Houston - Ef allt smellur saman gætu þeir orðið ofar. Gætu líka lent neðar ef Tracy hagar sér eins og hann á til að gera.
Utah - Get bara ekki sett þá neðar.
Portland - Held að allt gangi upp hjá þeim. Spurning hvað þeir fá fyrir Rahim.
Memphis - Hubie heldur áfram að koma á óvart. Gasol verður góður.


Bubble lið: Denver. Mér líkar ekki við þetta lið. Carmelo er asni.

Sigurvegari austurdeildar

Detroit Pistons ? Never underestemate the heart of a champion
Sigurvegari vesturdeildar

Spurs. - Sorrý Mummi.

NBA-meistarar

Spurs - Þeir sigla í gegnum þetta. Þeir munu líka sweepa Utah í regular seasoninu 5. árið í röð.

Ó, aumi heimur. Vesæli, vesæli heimur. Af hverju? Af hverju? Af hverju deyja hinir góðu allt of snemma. Snökt snökt.
Becky er dáin. Hvað getur maður sagt á slíkum tímamótum annað en að bænir okkar eru hjá CJ og Eric litla. Hvað verður? Ekki gott að segja en það lítur ekki vel út.

Við héldum Idol partý á föstudaginn. Þar var einstaklega góðmennt eins og þeir sem mættu geta borið vitni um. Þeir eru fáir. Þeir fengu þá ekkert nammi. Prófum líklega aftur næsta föstudag. Sjáum til hverjir mæta þá og hvernig verður tekið á móti þeim.

Við Auður lögðum land undir fót um helgina og skelltum okkur vestur til Bíldudals (reyndar fórum við nú meira í norður en í vestur en látum það liggja á milli hluta).
Tilefnið var að sjálfsögðu árshátíð vestfirskra harmónikkuleikara sem einmitt fór fram á Bíldudal. Við misstum því miður af ballinu því það var að sjálfsögðu löngu uppselt en pöntuðum miða á árshátiðina 2008 sem fram mun fara á Hólmavík. En annars skemmtum við okkur konunglega á leiðinni. Hvernig er annað hægt þegar keyrt er fjarða á milli í niðamyrkri og rigningu á malarvegum sem maður hefur aldrei séð áður.Enda tók ferðin sjö tíma og nánast kominn tími til að snúa aftur heim þegar við vorum loksins komin á staðinn. Annars var ágætt að vera á Bíldudal en mikið óskaplega er leiðinlegt að keyra á milli. Mín kenning er sú að ástæða brottflutninga frá Vestfjörðum sé sú að fólk skreppur í Borgina til að sinna einhverjum erindum en nennir svo ekki að keyra til baka aftur og ákveður að vera frekar peningalaust og húsnæðislaust en að þurfa að keyra þessa skelfilegu leið til baka. Að keyra inn fjörð á milli hárra fjalla getur svo sem verið fallegt og skemmtilegt en við 18. fjörðinn fer gamanið að kárna og ég tala nú ekki hversu grátlegt það er að geta nánast teygt sig yfir fjörðinn en þurfa engu að síður að keyra 200 kílómetra til að komast yfir hann. Brúum Breiðafjörðinn eða skerum Vestfjarðakjálkann af og látum hann fljóta burt. Og hananú.
Ekkert nýtt að frétta úr Bold eða Grönnum. En hafið ekki áhyggjur ég mun láta vita um leið og eitthvað gerist.
Ég á að dæma tvo leiki á næstu dögum. HK-Breiðablik og HK-Stjarnan. Það má því segja að örlög Hk-manna séu í mínum höndum. Það fer um mig hrollur þegar ég uppgötva þau völd sem ég bý yfir. Það er gaman að vera valdamikill. (Reality slap) Ég er bara dómari og er þar af leiðandi úrhrak jarðarinnar. Það fæ ég oft að heyra á leikjum. Ég ætla að fara að leggja mig. Stimpla mig út kl. 17.00. Bless á meðan þeir sem lesa þetta, sem eru ekki margir. En þeir sem lesa þetta mega samt gjarnan skrifa smákommnet svo að ég viti af þeim.

Það er alltaf gaman þegar Fram vinnur KR. Ég sit núna í vinnunni í Frampeysunni minni og geri grín að Bjössa því hann er svo mikill KR-ingur. Ég gæti líka gert grín að Hjölla, yfirmanni mínum, en það er líklega ekki góð hugmynd að espa upp manninn sem getur rekið mann. Þannig að ég ulla bara á hann þegar hann sér ekki til. Híhí

Það er allt á fullu í Bold og Grönnum. Í Bold er það helst að frétta að Becky er með krabbamein en enginn þorir að segja henni frá því. Hins vegar er búið að segja C.J. frá þvi og hann tók því frekar illa. Stay tuned... Í Grönnum líka mikið að gerast. Kartan hefur jafnað sig á dauða Dee en aðrir eiga í erfiðleikum með að ná fótfestu í lífinu. Spennan er mikil og ég get ekki beðið eftir að fá næsta þátt í hendurnar til þess að komst að því í hvaða ævintýri persónurnar rata næst. Og ég hef ekkert til að skrifa um...

Fór ekki á leikinn. Fékk ekki stúkumiðann. Er fúll. Ó já. Svei og skömm

Ég er enn að melta með mér hvort ég eigi að fara á landsleikinn á eftir. Ég ætlaði ekki að fara en svo áskotnaðist mér miði í stúku og því er freistingin nokkur. Hins vegar nenni ég varla að troða mér á þennan litla völl með 19.000 manns og horfa á leikinn þegar ég get setið heima og horft á hann í sjónvarpinu. Á hinn bóginn má segja að það gefist ekki oft tækifæri til að sjá ítalska landsliðið spila á pakkfullum velli. Hmmm. Ákvarðanir, ákvarðanir, ákvarðanir. Læt vita á morgun hver niðurstaðan varð. Ekki það að nokkur maður lesi þetta eða hafi yfirleitt nokkurn áhuga á þessu, en samt, ég vinn ekkert á meðan!

Feeling hot hot hot

Nú sit ég í vinnunni og borða ís. Það er eina leiðin til að lifa daginn af. (Þetta var aldeilis frumlegt blogg hjá þér Oddbergur. Gott að blogga um veðrið og hvað það heitt úti og svoleiðis. Ég sé Nóbelsverðlaunin á næsta leiti)

Af hverju voru aldrei sett hitamet á þeim 10 árum sem ég var að vinna úti á sumrin. Nú er vart þverfótað fyrir hitametum um allan bæ og ég þarf að sitja inni eins og einhver asni. Til að bæta gráu ofan á svart mætti Arnór í stuttbuxum í vinnuna og því þarf ég að horfa á bera leggi hans i allan dag. Ég hélt að því tímabili í lífi mínu væri lokið. En ég get hefnt mín með því að fara bara úr að ofan. Sá hlær best sem síðast hlær. Hahaha

Jæja, þá er enn ein tilraunin til að hefja bloggið aftur upp í hæstu hæðir (sem voru nú aldrei mikið hærri en Breiðholtið). Við Auður höfum nú komið okkur ágætlega fyrir í íbúðinni okkar (Langholtsvegi 198 ef einhver vildi heimsækja okkur og færa okkur innflutningsgjafir). Annars hef ég ekki mikið að segja að þessu sinni en vona að ég verði duglegri á næstunni að setja eitthvað inn.

Ta , ta dingdangdo

atkvæðagreiðsluþjónustuaðili er ljótasta orð sem ég hef á ævinni séð.

Fór í þrekprófið um á föstdaginn og var nokkuð kvíðinn því mér fannst ég ekki vera í jafn góðu formi og á sama tíma fyrir ári. Þá hljóp ég 2670 m á 12 mín. sem er alveg þokkalegt. Á föstudaginn hljóp ég hins vegar 2710 m. þannig að ég bætti mig aðeins. Svo fór ég austur á Selfoss þar sem ráðstefna deildardómara var haldin. Svo fór ég að spila með Ótta í gærkvöldi. Nú er ég með harðsperrur frá stóru tá upp í hársrætur.

Nú gætu sumir haldið að ég hefði runnið svo illa á áðurnefndu bananahýði að ég gæti ekki skrifað meira. Svo er nú ekki. Ég er á fullu að skrifa ritgerðina mína svo að ég geti nú einhverntíma hætt í þessum skóla. Ég held að ég eigi ekki mikið eftir en ég er orðinn nett þreyttur á þessu. Um helgina fæ ég þó frí því ég er að fara á landsdómararáðstefnu á Selfossi og þarf að taka þrekpróf. Frábært, ég hlakka til :(

Vissuð þið að það er í alvöru hægt að renna á bananahýði? Ég hélt að það væri bara til í teiknimyndum en mér tókst það um daginn. Merkileg lífsreynsla!

Erfið helgi að baki. Ekki eins og venjulega þegar maður segir að erfið helgi sé að baki heldur er ég svo líkamlega búinn að það er engu lagi líkt.Föstudagskvöldið var nú frekar rólegt en lætin byrjuðu á laugardeginum. Þá fórum við Auður í 1. árs afmæli Sóleyjar Nóttar, sem er dóttir systur hennar Auðar. Þar var gaman en nokkur læti og þá sérstaklega í tveimur ungum drengjum sem virtu ekki endilega eignarrétt Sóleyjar á gjöfunum heldur ruku til að opna pakkana hennar meðan foreldrar þeirra horfu stoltir á þessa duglegu drengi sína. Óþolandi. Svo fór ég upp í Egilshöll þar sem Ótti var að spila æfingaleik. Ég hugsaði mér gott til glóðarinnar því að ég vissi að það yrði fámennt hjá mínum mönnum. Hins vegar datt mér ekki í hug að ég þyrfti að spila allan leikinn eins og raun varð á. Ég spilaði mest sem vinstri bakvörður og skilaði varnarskyldu minni svo vel að ég fór ekki fram yfir miðju fyrr en eftir rúmlega 79 mínútur (leiktíminn var 80 mín) þá átti ég góðan sprett upp kantinn var kominn inn í vítateig (var ekki með boltann), Þengill fékk boltann inn í teignum ég hrópaði á hann og í því renndi Þengill boltanum í markið, allur þessi sprettur hjá mér fyrir ekki neitt og það var ekki kátur maður sem gekk inn í búningsklefann eftir leik. Svo fór ég og náði í Auði til systur hennar og þar var mér boðið upp á bjór sem ég þáði. Enda átti ég hann skilinn þar sem við Auður gáfum langflottustu gjöfina. Sunnudagurinn byrjaði rólega en um kvöldið fór ég að dæma í Reykjaneshöllinni þar sem Keflavík og ÍA spiluðu kom þá í ljós að eitthvað sat leikurinn frá því deginum áður í mér enn þá. Þessi leikur endaði 5-2 og var mjög hraður enda hef ég aldrei svitnað jafn mikið á ævi minni. Í dag fór ég í körfubolta. Á morgun kemst ég í fréttirnar þar sem ég verð fyrsti maðurinn í heiminum sem deyr úr harðsperrum. Nú get ég ekki skrifað meira.

Frekar dapur dómarafótbolti í gær. Við mættum bara fjórir og ákváðum þá að fara bara í einspark í staðinn fyrir að spila tveir á tvo. Ég var góður, aðrir ekki. Mér tókst nú ekki að setja boltann nema einu sinni yfir girðinguna og höfðu menn orð á því að þetta væri nú ekki nokkur frammistaða. En ég lofa að gera betur næst.

Ég nenni ekki neinu! Ég sit fyrir framan tölvuna og nenni satt að segja ekki að gera nokkurn skapaðan hlut. Verkefni næstu daga er að endurskrifa sögurnar sem ég ætla að nota í lokaverkefninu mínu og finna gömul og flott orð úr sögunum til að setja inn í til þess að auka orðaforða þessara krakkagemlinga. Vandamálið er að þau orð sem ég hef fundið í sögunum eru bara ekkert skemmtileg. "Krapparúm", "höfðafjöl" og "reyrbönd" eru allt saman merkileg orð og allra góðra gjalda verð, en þau eru ekki líkleg til þess að fá 10-12 ára gömul börn til þess að hoppa af kæti yfir því hvað þau séu skemmtileg. Því þarf ég líklega að skálda einhver skemmtileg orð til þess að kennarinn minn verði sáttur við verkefnið. Æ, þvílík armæða...

Jibbíjei! Ég var að skila af mér u.þ.b. 200 verkefnum sem ég hef lesið yfir undanfarnar tvær vikur. Ekkert, ég endurtek, ekkert getur verið leiðinlegra en að lesa 200 keimlík verkefni sem fjalla öll um það sama. „Eiga fyrirtæki að hugsa um það eitt að hámarka hagnað sinn eða eiga þau að bera einhverja félagslega ábyrgð." Ég get svarið að ef ég heyri nafnið Milton Friedman eða Thomas Mulligan aftur á næstunni þá mun ég æla. En í kvöld ætla ég í fótbolta með öðrum dómurum og mun þar fá útrás fyrir bræði mína. Ég stefni að því að setja að minnsta kosti fimm bolta yfir girðinguna í dag. Heyrumst

Hmmm, ég verð víst að fara að blogga eitthvað aftur því þessi afmælistilkynning er eitthvað farin að úreldast held ég. Annars hef ég haft það ágætt síðan síðast. Ég er búinn að fá fullt af pökkum en enn þá er pláss fyrir nokkra í viðbót ef einhver var of seinn að senda mér eða hefur enn þá löngun til þess. En nóg um það í bili. Þetta var frekar róleg helgi. Á föstudaginn fór ég á völlinn og sá Fram spila við ÍBV og kíkti svo til Kjarra þar sem að gamlir kanataktar voru rifjaðir upp. Ég vann. Á laugardeginum fór ég að dæma og fór svo beint í vinnuna í Getraunum og var þar fram á kvöld. Á sunnudeginum vaknaði ég við kröftugt bank á svefnherbergishurðina hjá mér. Þegar ég loksins opnaði beið þar 16 mánaða bróðurdóttir mín frekar óþolinmóð og skyldi ekkert í því af hverju henni væri ekki hleypt inn strax. Eftir að sá misskilningur var leystur og allir voru orðnir sáttir var of seint að fara að sofa aftur þannig að við Auður ákváðum að fara í bíltúr og enduðum í vöfflum hjá systur hennar. Vöfflur eru góðar. Svo var hugmyndin að vaka og glápa á Óskarinn, en ég sofnaði klukkutíma áður en hann byrjaði svo sú hugmynd fór aldeilis í vaskinn.

„Ég á afmæli í dag, ég á afmæli í dag, ég á afmæli sjálfur, ég á afmæli í dag" Húrra fyrir mér, ég lengi lifi...

Ég fór í bíb-testið á þriðjudaginn og komst að einu sem ég hefði svo sem getað sagt mér sjálfur. Maður á ekki að borða núðlusúpu áður en maður fer að hlaupa. Ég komst í 8-6 en þess má geta að það þykir góð fyrir einfætta konu sem er ólétt af tvíburum og er kominn 8 mánuði á leið. Ég fékk hins vegar tækifæri til að prófa aftur í gær og komst þá upp í 12-1 sem er fínt. Næst er það bara Reykjavíkurmaraþonið.

Ég var að sjá núna að það eru komnir hlekkir á aðrar síður á bloggið hjá mér. Það vissi ég ekki en ég gruna Atla Tý um græsku. Það er hins vegar fínt því ekki kann ég að gera þetta sjálfur.

Fékk þetta komment frá einhverjum Eyjólfi sem ég þekki ekkert, en hann er greinilega mikill smekkmaður „Kom á þessa síðu frá Jarlaskáldinu....fokkin snilld.“ Vissulega er líka möguleiki að Eyjólfur þessi sé maður mikillar kaldhæðni en ég kýs að skilja hann ekki þannig því þá líður mér betur.

Er á leiðinni í þrekpróf á eftir. Ég er ekki hrifinn af því. Þetta er gamla góða bíp-testið úr grunn- og framhaldsskóla sem ég hélt að ég væri laus við að eilífu. En nei, KSÍ finnst það góða hugmynd að láta alla landsdómara taka svoleiðis próf á hverjum vetri. Maður er enn þá með seinasta skammtinn af jólasteikinni í maganum og þá á maður að hlaupa eins og einhver vitleysingur. Jamm, maður þarf að vera vitlaus til að vera dómari.

Þessar gáfulegu samræður átti ég á MSN í dag Sverrir Friðriksson says:
Hvað er í gangi á víðavangi
Oddbergur says:
mjög lítið, sem ekki er skrýtið...
Sverrir Friðriksson says:
Það var leitt, en því verður ei breytt
Oddbergur says:
satt segirðu en ekki þegirðu
Sverrir Friðriksson says:
Vertu ekki með dónaskap, ég er kominn í... jólaskap
Oddbergur says:
þú kannt nú ekkert að ríma, þú ættir frekar að glíma við að líma
Sverrir Friðriksson says:
hættu þessu rugli, éttu væng af fugli
Oddbergur says:
ef fuglinn er fagur er ég ekki ragur... við að borða hann, fuglinn þann
Sverrir Friðriksson says:
drekktu kók og fáðu þér smók
Oddbergur says:
ef kókið er flott þá finnst mér það gott...
Oddbergur says:
en smókinn mun ég aldrei fá mér þó ég viti að það mun há mér
Sverrir Friðriksson says:
drekktu þá fleiri kækur og lestu heldur bækur
Oddbergur says:
bækur eru heldur fúlar en kækur eru frekar kúlar
Sverrir Friðriksson says:
keyptu þá sjeik og farðu í tölvuleik
Oddbergur says:
en ef sjeikinn er ekki góður verð ég alveg bandóður
Sverrir Friðriksson says:
fáðu þér þá nokkra bjóra og sestu svo framan við CMfjóra
Oddbergur says:
betri er séemminn en bannsett effemminn
Sverrir Friðriksson says:
nú er ég farinn, en ekki á barinn
Oddbergur says:
hvertertað fara ef ekki á nokkra bara?
Sverrir Friðriksson says:
nú ertu að klikka, hættu að pikka
Oddbergur says:
farðu nú og mjólkaðu kú
Sverrir Friðriksson says:
þær eru á næsta bæ, mjólkin'úr bænum fæ
Oddbergur says:
farðu þá og sjúgðu á
Sverrir Friðriksson says:
sjúgðu sjálfur geitur, gamli feitur
Oddbergur says:
farðu að vinna og kindur að finna

Meira varð nú ekki úr þessu samtali. Enn veit ég ekki hvort Sverrir átti eithver erindi við mig eður ei

Jamm, nú er búið að laga commentin mín og því hef ég enga afsökun fyrir því að blogga ekki lengur. Nú munu líklega margir spyrja „af hverju byrja aftur núna eftir svo langa bið?“ (Það er náttúrulega haugalýgi að ég margir muni spyrja. Þar sem ég hef ekki bloggað mjög lengi þá er enginn að lesa þetta og þar af leiðandi mun enginn spyrja þessarar spurningar. Hún var sett fram í ákveðnum tilgangi til þess að ég gæti útskýrt endurkomu mína). Jamm, en nóg um það, ástæðan fyrir því að ég ákvað að koma aftur er vægast sagt hégómleg. Þannig er að fyrir nokkrum dögum sat ég fyrir framan tölvuna og var að reyna hvað ég gat að skrifa ekki ritgerð. Endaði það með því að ég fór að lesa gömul blogg frá sjálfum mér. Kom þá í ljós að mér fannst ég vera svo skemmtilegur og fyndinn að ég fór að flissa upphátt og fékk fyrir það illt auga (ill augu) frá öðrum nemendum í tölvustofunni. Eftir þetta fór ég að hugsa að það væri nú synd að láta ekki aðra njóta þessa hæfileika minna og því ákvað ég að byrja aftur. Jamm

Atli Týr er að reyna að laga commentakerfið mitt núna. Ég vona að það komist í lag fljótlega

Ef einhver getur sagt mér hvar ég finn nýtt kommnetakerfi og hvernig á að virkja það má hinn sami senda póst á oddbergu@hi.is. En það les þetta enginn þannig að líkurnar á því að eitthvað gerist eru ekki miklar : (

Ég er bara að athuga hvort þetta stafarugl er enn þá á síðunni minni. Ef svo er ekki þá mun ég reyna að halda áfram að blogga aðeins. Hins vegar les þetta hvort eð er enginn þannig að það skiptir ekki máli.

Hver ? fjandanum er Berglind sem er a? commenta hj? mér (afsaki? or?brag?i?) ?etta er alls ekki illa meint :) Bara gaman að vita hverjir aðdáendur manns eru.

Ég hef ekki enn þá komist að því hvernig maður lagar þetta stafarugl í þessu rugli. Á meðan svo er ætla ég ekki að blogga mjög mikið. Reyndar efast ég um að margir séu að lesa þetta hvort eð er þannig að pressan er ekki mikil. En ef að einhver kann að laga þetta þá má hinn sami gjarnan hafa samband við mig.

Hvernig lagar maður þetta helv, djöf stafarugl?

Hmmm. Ekki datt mér í hug að fólk væri enn þá að skoða bloggið mitt og hvað þá að commenta á það. Ég er greinilega vinsælli en mér datt í hug. En þetta er allt í vinnslu. Nú er ég að fara að skrifa M.Paed ritgerðina mína og því má búast við því að ég not hvert tækifæri til þess að gera eitthvað annað í tölvunni en að skrifa ritgerð. Heyrumst fljótlega...

Ég boða endurkomu mína í bloggheima. Hversu öflug þessi endurkoma verður er ekki víst, þið verðið bara að bíða spennt

Asnalegt!!! Ég er búinn að monta mig af því að hafa staðið lengi í röð til þess að fá miða á Nick Cave og gert grín af öllum þeim sem fengu ekki miða. Og hvað er þá gert? Bætt við aukatónleikum þannig að afrek mitt verður ekki nærri jafn mikið og áður :( Svindl.

Það er minna en ekkert að gera í vinnunni minni. Í dag fórum við Gulli upp eftir og þrifum 7 stóla með tusku. Lagði mig kl 11 og við ákváðum að gera ekkert fram að mat. Kl 13 fórum við í Nesbúð svo að Gulli gæti sinnt ákveðnum erindum sem maður sinnir ekki á klósetti sem ekki er hægt að sturta niður í. Kl 14 kom bíll með grasfræ sem við bárum inn í hús og komum fyrir. Það tók u.þ.b. 15 mín. Fljótlega upp úr því ákváðum við að fara í bæinn og sannfærðum sjálfa okkur um að við gætum mætt tæpum klukkutíma fyrr í bæinn vegna þess að við tókum ekkert kaffi. Það virkaði!!!

Ég var að fá staðfest hverjir verða í hópnum mínum í sumar. Ég verð með fimm undirmenn og þar á meðal Auði, sem er gaman. Fyndið, ég fæ að vera yfirmaður hennar milli 7:30 og 17:30 alla virka daga. Á öðrum tímum er hún yfirmaður. Hina í hópnum mínum þekki ég ekkert.

Er nokkuð leiðinlegra en tvö ítölsk lið í úrslitaleik??? Ég held ekki. Ánægður með mína menn í Fram, alltaf gaman að hirða stig af KR. Skemmtilegra hefði verið að vinna þá en það er ekki á allt kosið.

Mig langar til að óska Sollu og Gunna til hamingju með frumburðinn en þau voru að eignast litla stelpu þann 17. maí. Fjölskylduna má skoða hér. Þá langar mig líka til að óska Sollu til hamingju með daginn en hún á afmæli í dag. Tralalalalalalalala Hún á afmæli í dag

Jæja ég er loksins byrjaður að vinna og get því farið að slökkva á heilanum aftur. Sumarið er tíminn, In the Summertime, Summertime Slues o.s.frv. Er að vinna með Nóra og Gulla þessa dagana. Sakna Mumma. Mummi er góður strákur og ég vona að hann fari bráðum að koma heim. Ég fékk að vita að ég fæ sennilega 7 manna hóp í sumar og að Auður verður í mínum hópi :) Annars er það alger brandari að ég skuli vera byrjaður að vinna svona snemma því það er ENGIN þörf á því að hafa þrjá menn í vinnu í hálfan mánuð við að undirbúa sumarið. En Maðurinn vill borga mér peninga og ég hef ekki efni á því að afþakka peninga. Verst er að það truflar aðeins ritgerðaskrifin mín en ég á enn þá eftir að klára síðustu ritgerðina í KHÍ. En hverjum er ekki sama... Summer in the City, Summertime, Sól sól skín á mig,

Það voru einhverjir að hóta því að henda mér út ef að ég skrifaði ekkert á næstunni. Nú er ég búinn að skrifa eitthvað. En hafið ekki áhyggjur það kemur meira alveg á næstunni.

Byrjaði í æfingakennslunni í dag. Ég er að kenna tvo bekki í MS, samtals 16 tíma. Það munaði engu að ég hefði klúðrað þessu algerlega því ég fattaði ekki hvað það er lítið eftir af skólanum (bara tvær vikur). Sem betur fer náði kennarinn minn að bjarga þessu fyrir mig þannig að ég ætti að ná að klára á „réttum“ tíma. Eini gallinn við þetta er sá að ég þarf að kenna krökkunum bókmenntir 20. aldar sem er ekki mín sterkasta hlið. En að vísu komst ég að því í dag að ég er samt töluvert klárari í þessu en þau. En þegar maður er að kenna bókmenntir 20. aldar þá er bara ein bók kennd, en það er hin bráðskemmtilega „Sögur, ljóð og líf“ eftir hinn bráðskemmtilega stílista Heimi Pálsson sem er best þekktur fyrir bækur sínar „Frásagnalist fyrri alda“ og „Straumar og stefnur.“ Þannig að þið getið ímyndað ykkur gleði mína þegar ég fékk að rifja upp þessa miklu gleði.

Ég hræðist ekki hótanir þínar Jarlaskald!!!

Ég hef ekkert bloggað af því að ég hef ekkert haft að segja!!!

Ég var að sækja um vinnu í síðustu viku. Það kemur sennilega ekki mörgum á óvart að ég sótti um sumarstarf hjá Orkuveitunni. Ég held að við Nóri seum núna búnir að slá öll met.

Gaman gaman, ég get farið að rukka aftur á netinu. Eftirfarandi skulda mér pening. Maggi kr 1000, Gunni og Solla kr 2000, Kjarri og Laufey kr 2000. Takk fyrir

Lífið leikur mig grátt þessa dagana. Í gær var ég að missa bílinn minn í nokkra daga þar sem að hann fór í viðgerð (að sjálfsögðu fór hann ekki sjálfur, ég keyrði hann). Þannig að þessa vikuna þarf ég líklega að treysa á almenningssamgöngur eða fara ekki úr húsi. Ég er ekki frá því að seinni hugmyndin sé betri.

Þorri frændi átti afmæli í gær. Mig langar til þess að óska litla kúti til hamingju afmælið.Mér finnst svo stutt síðan við notuðum hann til þess að mæla hitastig lækja og áa. Snökt snökt, hvað tíminn líður hratt. „sun goes up, sun goes down, and the cat's in the craddle...“ megi þeir skilja sem vilja.

Svo að lokum ætla ég bara að taka það fram að ég er búinn að taka þrekprófið sem ég minntist um daginn. Ég og Þorri frændi hlupum nákvæmlega það sem þurfti og ekki skrefi lengur. Af hverju að hlaupa of mikið ef maður þarf þess ekki???

Svo vil ég óska þeim Sollu og Hrafnhildi til hamingu með daginn en þær voru báðar að útskrifast í dag.

Algjört svindl!!! Á morgun á ég afmæli (23.feb) en það er ekki það sem er algert svindl. Nei, svindlið er að einhverjir óvandaðir menn hjá almanaki Háskólans ákváðu að troða einhverjum asnalegum konudegi á afmælisdaginn minn. Maður á einn dag á ári og mér finnst alger óþarfi að ég þurfi að deila deginum mínum með einhverjum konum.

Ég hef verið ásakaðu u maumingjablogg að undanförnu. Ég get að vísu ekki neitað því en ég ætla að reyna að bæta úr því á næstunni. Það er nefnilega heilmikið að gera hjá mér í skólanum á næstunni og þess vegna fer maður að gera eitthvað allt annað á meðan en að læra.

Ég skoraði á æfingu á mánudaginn en Helgi bróðir ekki. Mitt lið vann hans lið með einu marki eftir að hafa verið 9 mörkum undir. Ég skoraði næst síðasta og jafnframt jöfnunarmarkið. Það braut andstæðinginn algerlega niður. Það er einhver mesta niðulæging sem menn þekkja að láta mig skora hjá sér. Næstum því jafn vont og þegar Helgi bróðir skorar!

Ég átti að vera í þrekprófi í kvöld með öðrum dómurum en varð að afboða mig vegna þess að ég er að vinna og líka vegna þess að ég er með hælsæri. Ég er feginn því að vera að vinna vegna þess að hælsæri er einhver lélegasta afsökun sem maður getur komið með. Ekki vegna þess að það sé ekki gild afsökun, hælsæri getur verið fjandi sárt, en það hljómar samt alltaf eins og léleg afsökun. En ég er ekki hræddur við þetta próf enda er í fantaformi sem endranær!!!

Ég vil benda öllum á það að ég á bráðum afmæli. Blóm og kransar afþakkaðir en pakkar vel þegnir!

Núna er ég að horfa á þrjá landsleiki í einu: England-Ástralía, Holland-Argentína og Skotland-Írland. Þetta er ólíkt skemmtilegri vinna en viðskiptafræðiverkefnin!

Ég eyddi allri síðustu viku í að fara yfir verkefni í viðskiptafræðikúrs sem heitir Tjáning og samskipti. Markmiðið með þessum kúrsi er að kenna fólki hvernig á að tjá sig í atviinlífinu og satt að segja veitir ekki af. Ég ætla ekki að segja nákvæmlega hvernig þetta var, enda held ég að það sé bannað. Einkunnirnar voru á bilinu 0.5 - 9.0 og voru frekar í lægri kantinum. Þar mátti finna setningar á borð við „en það skipti ekki máli því þetta voru bara lúðar úr MORFÍS...“, enda eru allir á skattinum þverir og vitlausir og viðurkenna aldrei mistök sín“ og „enda eru alþingismenn almennt ekki mikið fyrir augað.“ Þessir textar voru úr ímyndaðri skýrslu sem átti að sannfæra lesendur um mikilvægi góðra boðskipta í atvinnulífinu. Þessar setningar (og fleiri) sannfærðu mig einna helst um að ekki væri vanþörf á því að kenna þetta námskeið!!!